السلام عليكم و رحمة الله تعالى و بركاته
حبيت نشارككم مشكلتي اللي حيراتني و مالقيت ليها حل
انا عندي 19 سنة مزوجة راجل اكبر مني ب 23 سنة و حسابلي شارب عقلو و قلت هنا نبات ، و عايشة مع راجلي هادي عام حيت هو كان في المانيا و عاد عام باش التحقت بيه
مشكلتي بدات معاه ملي جيت لعندو شفت وجه آخر تعامل جديد بحال ايلا ماشي هو الراجل اللي عرفت ولا اللي كنت كنضنو كان يحسابلي رجل متدين ساعة صدق السيد فاهم الدين بالمقلوب و بحال ايلا مريض نفسيا ، جيت لدار صغيرة بزاف و قلت ماشي مشكل الغربة هادي و الواحد يقضي باش ما عطا الله واخا مره مره ملي كتكون عندو الفلوس كنطلبوا يجيب شي حاجة جديدة للدار كيقولي ماشي شغلك داري هادي و ندخل ليها اللي بغيت و كيقولي ايلا ما عجباتكش هاكا سيري عند باك و زايدها بالنفاق ملي كيهدر مع دارنا كيبان في شكل آخر و باللي زعما كيخاف عليا و كيبغيني و كيقولهم انا ماباغيش نصيفطها حيت كنخاف عليها و ملي كنكونو بزوج كيقولي ما عنديش و واخا يكونوا عندي مابغيتش نصيفطك من حقي دابا راكي ديالي و حتى من الحوايج اللي كنلبس دارنا اللي كل شهرين مصدعاهم باش يشريولي و ديما كيصيفطوا لي الباليزات و الصيكان دابا عام هادي و حنا على هاد الموال و صابرة على البخل ديالو و صابرة على مرضه و لكن مؤخرا ولا كيضربني و كلمة زوج كيدفعني ولا كيصرفقني و هادشي قدام عائلتو ماكيحيرش فيا و دابا هادي شهرين جاب ليا خوه مسكنو معانا وانا عندي غير بيت و كوزينة و ماخدام ما كيقرا غيت تيتي نيني عندي في الدار و ماقاداش نصبر عليه حيت هو بالنسبة لي براني و مكناخدش راحتي تا فداري و فينما نجبد ليه موضوع ديال نشوفوا شي دار اخرى فيها زوج بيوت باش زعما نلقى راحتي كيقولي حمدي الله راه الرسول كان عايش غير ف بيت 2 متر على 3 و نقول ليه بغيت نشري شي حاجة و لا باغا نكمل قرايتي كيقولي اش غديري ڭاع غتجمعي وسخ الدنيا وهي لا تساوي جناح بعوضة و كيقول هادشي و معصب و مكشكش و هادي سيمانة شافنا خوه كنتغاوتو و بدا كيهدر و كيقولي كتفهمي شوية في الطوموبيلات قلت لو اه علاش قالي الطوموبيل قبل ما تخرج من المحل باقا جديدة كتكون غالية و لكن غير كيستعملها شي حد كترخاص و ما كتبقى عندها قيمة و ثمنها كيهبط بزاف و اللي غيشريها ثاني مره ماشي بحال داك اللي شراها اول مره و لاحها ايوا هاكاك نتيا ابنتي , تكمشي و حمدي الله على راجلك راه الناس مالقاوهش و هاد الهدره ديالو عاد مازادت عصباتني و انا نهدر مع بابا و ماما قلت ليهم انا جاية للمغرب و مانعاودش نرجع ليه راه وليت بحال الجفاف في عائلتو و قالي بابا هاداك راه تبارك الله حافظ القرآن و مستحيل يكون كيدير هاكا و كيقولي راك غير باقا صغيرة و ماعندك عقل صبري مع راجلك و ملي اكدت على الموضوع ماما بدات كتبكي و قالو لي ايلا طلقتي ماترجعيش عندنا دابا انا حايرة واش نصبر على الضرب و تزراق العينين و الذل اللي انا فيه على وديت واليديا واخا غير تاندير وراقي بعدا ولا نكمدها و نمشي لدارنا و اللي بغات تكون تكون راه و الله كنكتب هادشي و كنبكي و ربي اللي عالم باش كنحس عافاكم ايلا ما عاونوني و نصحوني و سمحولي ايلا طولت عليكم
